zahmat kabhi kabhi to mashaqqat kabhi kabhi

zahmat kabhī kabhī to mashaqqat kabhī kabhī

lagtī hai zindagī bhī musībat kabhī kabhī

pahlū meñ jāgtī hai mohabbat kabhī kabhī

aatī hai haath dard kī daulat kabhī kabhī

ab tak tire baġhair maiñ zinda huuñ kis tarah

hotī hai apne aap pe hairat kabhī kabhī

ik pal kā jo visāl thā un māh-o-sāl meñ

detā hai hijr meñ bhī rifāqat kabhī kabhī

chheḌe vafā kā giit koī naġhma-sāz jab

ḳhud se bhī hone lagtī hai vahshat kabhī kabhī

ik raat hijr kī hai musalsal hamāre saath

tum par guzartī hogī qayāmat kabhī kabhī

sulgī hai terī yaad meñ ye ruuh raat din

dene lagī hai lau ye rifāqat kabhī kabhī

duniyā ke vāste jo bahut be-shu'ūr thā

us se milī hai 'ishq ko vaq'at kabhī kabhī

mujh ko tirī jafā kā to shikva nahīñ magar

aatī hai yuuñ hī lab pe shikāyat kabhī kabhī

maiñ dard se najāt kī tālib nahīñ magar

'shāhīn' kam ho thoḌī sī shiddat kabhī kabhī

zahmat kabhi kabhi to mashaqqat kabhi kabhi

lagti hai zindagi bhi musibat kabhi kabhi

pahlu mein jagti hai mohabbat kabhi kabhi

aati hai hath dard ki daulat kabhi kabhi

ab tak tere baghair main zinda hun kis tarah

hoti hai apne aap pe hairat kabhi kabhi

ek pal ka jo visal tha un mah-o-sal mein

deta hai hijr mein bhi rifaqat kabhi kabhi

chheDe wafa ka git koi naghma-saz jab

KHud se bhi hone lagti hai wahshat kabhi kabhi

ek raat hijr ki hai musalsal hamare sath

tum par guzarti hogi qayamat kabhi kabhi

sulgi hai teri yaad mein ye ruh raat din

dene lagi hai lau ye rifaqat kabhi kabhi

duniya ke waste jo bahut be-shu'ur tha

us se mili hai 'ishq ko waq'at kabhi kabhi

mujh ko teri jafa ka to shikwa nahin magar

aati hai yun hi lab pe shikayat kabhi kabhi

main dard se najat ki talib nahin magar

'shahin' kam ho thoDi si shiddat kabhi kabhi