zahrab rag-e-jaan mein utara hi bahut tha

zahrāb rag-e-jāñ meñ utārā hī bahut thā

bastī ne tirī mujh ko rulāyā hī bahut thā

vīrān hue aah ke asarāt se maskan

logoñ ne mujhe mil ke satāyā hī bahut thā

honā thā kisī roz hameñ yuuñ bhī to paspā

palkoñ pe tujhe ham ne biThāyā hī bahut thā

ik roz to milnā thā jafā-kash ko sila bhī

paiġhām-e-vafā ham ne sunāyā hī bahut thā

girnā thā kisī roz bulandī se hameñ bhī

ḳhvāboñ kā nasha aañkh pe chhāyā hī bahut thā

'ḳhanda' ye jo maiñ detī bhī to qarz kahāñ thā

pahle se azīzoñ pe baqāyā hī bahut thā

zahrab rag-e-jaan mein utara hi bahut tha

basti ne teri mujh ko rulaya hi bahut tha

viran hue aah ke asaraat se maskan

logon ne mujhe mil ke sataya hi bahut tha

hona tha kisi roz hamein yun bhi to paspa

palkon pe tujhe hum ne biThaya hi bahut tha

ek roz to milna tha jafa-kash ko sila bhi

paigham-e-wafa hum ne sunaya hi bahut tha

girna tha kisi roz bulandi se hamein bhi

KHwabon ka nasha aankh pe chhaya hi bahut tha

'KHanda' ye jo main deti bhi to qarz kahan tha

pahle se azizon pe baqaya hi bahut tha