zaKHm-e-jigar unhen bhi dikha lun to chain lun

zaḳhm-e-jigar unheñ bhī dikhā luuñ to chain luuñ

is hausle kī daad bhī pā luuñ to chain luuñ

kyūñkar taḌap taḌap ke guzārī tamām raat

ye mājrā unheñ bhī sunā luuñ to chain luuñ

ye to bajā ki farq nahīñ husn-o-ishq meñ

un ko bhī ham-ḳhayāl banā luuñ to chain luuñ

sahrā-navardiyoñ se to bezār huuñ magar

kuchh faiz bhī junūñ se uThā luuñ to chain luuñ

har shaḳhs kā mazāq yahāñ hai judā judā

mahfil pe apnā rang jamā luuñ to chain luuñ

hāsil to ho sakegā na kuchh kū-e-ishq meñ

qismat meñ Thokareñ jo haiñ khā luuñ to chain luuñ

vo daad de rahe haiñ mujhe iztirāb kī

kuchh ban chalī hai baat banā luuñ to chain luuñ

'sāhir' jinhoñ ne mujh ko satāyā hai aaj tak

thoḌā sā maiñ bhī un ko satā luuñ to chain luuñ

zaKHm-e-jigar unhen bhi dikha lun to chain lun

is hausle ki dad bhi pa lun to chain lun

kyunkar taDap taDap ke guzari tamam raat

ye majra unhen bhi suna lun to chain lun

ye to baja ki farq nahin husn-o-ishq mein

un ko bhi ham-KHayal bana lun to chain lun

sahra-nawardiyon se to bezar hun magar

kuchh faiz bhi junun se uTha lun to chain lun

har shaKHs ka mazaq yahan hai juda juda

mahfil pe apna rang jama lun to chain lun

hasil to ho sakega na kuchh ku-e-ishq mein

qismat mein Thokaren jo hain kha lun to chain lun

wo dad de rahe hain mujhe iztirab ki

kuchh ban chali hai baat bana lun to chain lun

'sahir' jinhon ne mujh ko sataya hai aaj tak

thoDa sa main bhi un ko sata lun to chain lun