zaKHm koi ek baDi mushkil se bhar jaane ke baad

zaḳhm koī ik baḌī mushkil se bhar jaane ke ba.ad

mil gayā vo phir kahīñ dil ke Thahar jaane ke ba.ad

maiñ ne vo lamha pakaḌne meñ kahāñ tāḳhīr kī

sochtā rahtā huuñ ab us ke guzar jaane ke ba.ad

kaisā aur kab se ta.alluq thā hamārā kyā kahūñ

kuchh nahīñ kahne ko ab us ke mukar jaane ke ba.ad

mil rahā hai sub.h ke taare se jaatā māhtāb

raat ke tārīk ziine se utar jaane ke ba.ad

kyā karūñ āḳhir chalānā hai mujhe kār-e-jahāñ

jam.a ḳhud ko kar hī letā huuñ bikhar jaane ke ba.ad

zaḳhm ik aisā hai jis par kaam ab kartā nahīñ

vaqt kā marham zarā sā kaam kar jaane ke ba.ad

chup haiñ yuuñ chīzeñ ki khul kar saañs bhī letī nahīñ

jaise ik sadme kī hālat meñ huuñ Dar jaane ke ba.ad

haiñ navāh-e-dil meñ 'shāhīñ' kuchh nashebī bastiyāñ

Dūbtā rahtā huuñ un meñ paanī bhar jaane ke ba.ad

zaKHm koi ek baDi mushkil se bhar jaane ke baad

mil gaya wo phir kahin dil ke Thahar jaane ke baad

main ne wo lamha pakaDne mein kahan taKHir ki

sochta rahta hun ab us ke guzar jaane ke baad

kaisa aur kab se talluq tha hamara kya kahun

kuchh nahin kahne ko ab us ke mukar jaane ke baad

mil raha hai subh ke tare se jata mahtab

raat ke tarik zine se utar jaane ke baad

kya karun aaKHir chalana hai mujhe kar-e-jahan

jama KHud ko kar hi leta hun bikhar jaane ke baad

zaKHm ek aisa hai jis par kaam ab karta nahin

waqt ka marham zara sa kaam kar jaane ke baad

chup hain yun chizen ki khul kar sans bhi leti nahin

jaise ek sadme ki haalat mein hun Dar jaane ke baad

hain nawah-e-dil mein 'shahin' kuchh nashebi bastiyan

Dubta rahta hun un mein pani bhar jaane ke baad