zaKHm mahkaen koi tir-e-nazar yaad karen

zaḳhm mahkā.eñ koī tīr-e-nazar yaad kareñ

manzil-e-hijr pe kyā ranj-e-safar yaad kareñ

phir pukāre hai kahīñ mahmil-e-lailā kī jaras

phir koī fasl-e-junūñ chāk-e-jigar yaad kareñ

kis kī ḳhushbū se shab-e-vā'da havā raqs meñ hai

kyoñ munājāt-e-vafā kūcha-o-dar yaad kareñ

aao kuchh der ko is dushman-e-jāñ kī ḳhātir

be-ruḳhī oḌh ke jiine kā hunar yaad kareñ

raat bhaTke tire gesū kī shikan meñ jānāñ

tere chehre ko tilismāt-e-sahar yaad kareñ

rang phūTeñ to ḳhad-o-ḳhāl tumhāre DhūñDeñ

sang TūTeñ to koī dast-e-hunar yaad kareñ

kho gayā dāman-e-sahrā meñ 'razī' kis kā lahū

ye bagūle kise ab ḳhāk-ba-sar yaad kareñ

zaKHm mahkaen koi tir-e-nazar yaad karen

manzil-e-hijr pe kya ranj-e-safar yaad karen

phir pukare hai kahin mahmil-e-laila ki jaras

phir koi fasl-e-junun chaak-e-jigar yaad karen

kis ki KHushbu se shab-e-wa'da hawa raqs mein hai

kyon munajat-e-wafa kucha-o-dar yaad karen

aao kuchh der ko is dushman-e-jaan ki KHatir

be-ruKHi oDh ke jine ka hunar yaad karen

raat bhaTke tere gesu ki shikan mein jaanan

tere chehre ko tilismat-e-sahar yaad karen

rang phuTen to KHad-o-KHal tumhaare DhunDen

sang TuTen to koi dast-e-hunar yaad karen

kho gaya daman-e-sahra mein 'razi' kis ka lahu

ye bagule kise ab KHak-ba-sar yaad karen