zaKHm mahke hain gul-ruKHon ki tarah

zaḳhm mahke haiñ gul-ruḳhoñ kī tarah

ham bhī zinda haiñ hasratoñ kī tarah

tum ko ḳhushbū banā ke chhoḌeñge

ham meñ bū-bās hai guloñ kī tarah

kitne chehre lagā.e phirte haiñ

aaj insān rāvanoñ kī tarah

roz āb-e-hayāt piitā huuñ

roz martā huuñ maiñ guloñ kī tarah

jis ko paalā vahī to zehn ham ko

Dastā rahtā hai nāginoñ kī tarah

taptā rahtā huuñ ret ke mānind

koī barse to bādaloñ kī tarah

ab kahāñ jaa.eñ kis tarah jaa.eñ

dard phailā hai rāstoñ kī tarah

is girānī ke daur meñ 'anjum'

apne siine haiñ maqbaroñ kī tarah

zaKHm mahke hain gul-ruKHon ki tarah

hum bhi zinda hain hasraton ki tarah

tum ko KHushbu bana ke chhoDenge

hum mein bu-bas hai gulon ki tarah

kitne chehre lagae phirte hain

aaj insan rawanon ki tarah

roz aab-e-hayat pita hun

roz marta hun main gulon ki tarah

jis ko pala wahi to zehn hum ko

Dasta rahta hai naginon ki tarah

tapta rahta hun ret ke manind

koi barse to baadalon ki tarah

ab kahan jaen kis tarah jaen

dard phaila hai raston ki tarah

is girani ke daur mein 'anjum'

apne sine hain maqbaron ki tarah