zaKHm sine ka phir ubhar aaya

zaḳhm siine kā phir ubhar aayā

yaad bhar koī chāra-gar aayā

mujh ko baḳhshī ḳhudā ne ik beTī

chāñd āñgan meñ ik utar aayā

ḳhush nasīboñ ko ghar milā yaaro

mere hisse meñ phir safar aayā

tum taġhayyur kī baat par Thahre

maiñ salīboñ se baat kar aayā

apnī tahzīb ko nahīñ chhoḌā

ye bhī ilzām mere sar aayā

ik kalī khil ke phuul meñ badlī

ek bhañvrā bhī phuul par aayā

paar utrā ufuq ke sūraj to

phir musāfir ko yaad ghar aayā

dostī dhuup se hī kar lī jab

raah meñ tab ghanā shajar aayā

dil to 'shāyān' TūTnā hī thā

us kā kirdār bhī nazar aayā

zaKHm sine ka phir ubhar aaya

yaad bhar koi chaara-gar aaya

mujh ko baKHshi KHuda ne ek beTi

chand aangan mein ek utar aaya

KHush nasibon ko ghar mila yaro

mere hisse mein phir safar aaya

tum taghayyur ki baat par Thahre

main salibon se baat kar aaya

apni tahzib ko nahin chhoDa

ye bhi ilzam mere sar aaya

ek kali khil ke phul mein badli

ek bhanwra bhi phul par aaya

par utra ufuq ke suraj to

phir musafir ko yaad ghar aaya

dosti dhup se hi kar li jab

rah mein tab ghana shajar aaya

dil to 'shayan' TuTna hi tha

us ka kirdar bhi nazar aaya