zamana ab ye kaisa aa raha hai

zamāna ab ye kaisā aa rahā hai

ki har badmast sambhlā jā rahā hai

jalātī hai ḳhirad sham'oñ pe sham'eñ

añdherā hai ki baḌhtā jā rahā hai

du'ā.eñ kar rahe haiñ ahl-e-sāhil

safīna hai ki Duubā jā rahā hai

magar baḌhtī nahīñ hai baat aage

zamāna hai ki guzrā jā rahā hai

bharā thā rang jis ḳhāke meñ barsoñ

vo ḳhāka yak ba yak dhuñdlā rahā hai

mohabbat aap hī manzil hai apnī

na jaane husn kyuuñ itrā rahā hai

maiñ ḳhud tasvīr bantā jā rahā huuñ

tasavvur meñ mire kaun aa rahā hai

kisī se phir mohabbat ho rahī hai

mujhe phir pyaar dil par aa rahā hai

nigāh-e-'ishq kī vus'at na pūchho

jahān-e-husn simTā jā rahā hai

judā us ko na samjho kārvāñ se

'imām' ik bāñkpan se aa rahā hai

zamana ab ye kaisa aa raha hai

ki har badmast sambhla ja raha hai

jalati hai KHirad sham'on pe sham'en

andhera hai ki baDhta ja raha hai

du'aen kar rahe hain ahl-e-sahil

safina hai ki Duba ja raha hai

magar baDhti nahin hai baat aage

zamana hai ki guzra ja raha hai

bhara tha rang jis KHake mein barson

wo KHaka yak ba yak dhundla raha hai

mohabbat aap hi manzil hai apni

na jaane husn kyun itra raha hai

main KHud taswir banta ja raha hun

tasawwur mein mere kaun aa raha hai

kisi se phir mohabbat ho rahi hai

mujhe phir pyar dil par aa raha hai

nigah-e-'ishq ki wus'at na puchho

jahan-e-husn simTa ja raha hai

juda us ko na samjho karwan se

'imam' ek bankpan se aa raha hai