zamana chhoD kar ghar aa gae hain

zamāna chhoḌ kar ghar aa ga.e haiñ

tirī mahfil se uTh kar aa ga.e haiñ

haqīqat jaan lī hai terī jab se

tire ḳhvāboñ se bāhar aa ga.e haiñ

kisī ne bhejā hai paiġhām mujh ko

mirī chhat par kabūtar aa ga.e haiñ

ga.e the jītne dil phir kisī kā

dil apnā haar kar ghar aa ga.e haiñ

mire rab ne mirī āvāz sun lī

madad meñ merī lashkar aa ga.e haiñ

nahīñ māñgā kabhī ham ne sahārā

yahāñ tak apne dam par aa ga.e haiñ

zamana chhoD kar ghar aa gae hain

teri mahfil se uTh kar aa gae hain

haqiqat jaan li hai teri jab se

tere KHwabon se bahar aa gae hain

kisi ne bheja hai paigham mujh ko

meri chhat par kabutar aa gae hain

gae the jitne dil phir kisi ka

dil apna haar kar ghar aa gae hain

mere rab ne meri aawaz sun li

madad mein meri lashkar aa gae hain

nahin manga kabhi hum ne sahaara

yahan tak apne dam par aa gae hain