zamana ke bare mein usko KHabar hai

zamāna ke baare meñ us ko ḳhabar hai

agar hai to apne se vo be-ḳhabar hai

sunāne meñ tum ko zamānā lagegā

mirā qissa-e-ġham bahut muḳhtasar hai

mire paañv thakte nahīñ hai safar se

koī to batā.e ye kaisā safar hai

yahī soch kar aa ke baiThī yahāñ par

sunā hai ki terī yahī rahguzar hai

girāyā jise maiñ ne nazroñ se apnī

vo insān to aaj tak dar-ba-dar hai

palaT kar maiñ aa jā.ūñgī terī ḳhātir

tujhe aaj merī zarūrat agar hai

sivā sabr ke aur kyā kah sakūñgī

tirī teġh ke nīche hī merā sar hai

mirā haal pūchhe hai vo aate jaate

mire ghar ke bāhar jo būḌhā shajar hai

ikaa.ī se nau tak pahuñch bhī jo jā.ūñ

dahā.ī banūñ kaise tū hī sifar hai

ajab ḳhauf kā 'anjanā' hai ye aalam

mujhe ḳhud se tujh ko zamāne se Dar hai

zamana ke bare mein us ko KHabar hai

agar hai to apne se wo be-KHabar hai

sunane mein tum ko zamana lagega

mera qissa-e-gham bahut muKHtasar hai

mere panw thakte nahin hai safar se

koi to batae ye kaisa safar hai

yahi soch kar aa ke baiThi yahan par

suna hai ki teri yahi rahguzar hai

giraya jise main ne nazron se apni

wo insan to aaj tak dar-ba-dar hai

palaT kar main aa jaungi teri KHatir

tujhe aaj meri zarurat agar hai

siwa sabr ke aur kya kah sakungi

teri tegh ke niche hi mera sar hai

mera haal puchhe hai wo aate jate

mere ghar ke bahar jo buDha shajar hai

ikai se nau tak pahunch bhi jo jaun

dahai banun kaise tu hi sifar hai

ajab KHauf ka 'anjana' hai ye aalam

mujhe KHud se tujh ko zamane se Dar hai