zamane ki inayat chahta hun

zamāne kī ināyat chāhtā huuñ

maiñ thoḌī sī mohabbat chāhtā huuñ

mirī kashtī to Dūbegī yaqīnan

nadī kī bhī nadāmat chāhtā huuñ

tire dariyā tujhe lauTā diye haiñ

samundar huuñ maiñ rāhat chāhtā huuñ

mujhe to zahr piinā hī paḌegā

magar terī rifāqat chāhtā huuñ

maiñ aasī huuñ magar terī ināyat

ḳhudā maiñ tā-qayāmat chāhtā huuñ

har ik sachchā.ī us se kah sakūñ maiñ

zabāñ meñ itnī himmat chāhtā huuñ

mirī rag rag meñ aur sāñsoñ meñ yā-rab

utar jaa.e sharī.at chāhtā huuñ

zamane ki inayat chahta hun

main thoDi si mohabbat chahta hun

meri kashti to Dubegi yaqinan

nadi ki bhi nadamat chahta hun

tere dariya tujhe lauTa diye hain

samundar hun main rahat chahta hun

mujhe to zahr pina hi paDega

magar teri rifaqat chahta hun

main aasi hun magar teri inayat

KHuda main ta-qayamat chahta hun

har ek sachchai us se kah sakun main

zaban mein itni himmat chahta hun

meri rag rag mein aur sanson mein ya-rab

utar jae shariat chahta hun