zamane ko zer-o-zabar kar diya

zamāne ko zer-o-zabar kar diyā

ye kyā tū ne ai chashm-e-tar kar diyā

lagā rakhnā qātil ke shāyāñ nahīñ

idhar kar diyā yā udhar kar diyā

kiyā aur bhī mere qāsid ne shoḳh

jo us ko mirā nāma-bar kar diyā

sabā ne lagā.ī kahāñ kī kahāñ

idhar aah kī vaañ ḳhabar kar diyā

ḳhalish nok-e-mizhgāñ kī kuchh kam na thī

baḌhā kar use neshtar kar diyā

mirī sham-e-ummīd gul ho ga.ī

sitam tū ne bād-e-sahar kar diyā

thapak kar sulāyā mujhe bār-bār

maiñ thā bā-ḳhabar be-ḳhabar kar diyā

vafā.eñ hamārī akārat ga.iiñ

raqīboñ ko jaam us ne bhar kar diyā

jo muddat se thī jī meñ ab Than ga.ī

dil-e-pur-ḳhatar be-ḳhatar kar diyā

jidhar terā tīr-e-nazar chal gayā

idhar maiñ ne nazr ik jigar kar diyā

nazar mujh se qātil churā jā.egā

agar maiñ ne sīna-sipar kar diyā

tumhārī ḳhamoshī ne us ko 'fahīm'

sitamgār se fitna-gar kar diyā

zamane ko zer-o-zabar kar diya

ye kya tu ne ai chashm-e-tar kar diya

laga rakhna qatil ke shayan nahin

idhar kar diya ya udhar kar diya

kiya aur bhi mere qasid ne shoKH

jo us ko mera nama-bar kar diya

saba ne lagai kahan ki kahan

idhar aah ki wan KHabar kar diya

KHalish nok-e-mizhgan ki kuchh kam na thi

baDha kar use neshtar kar diya

meri sham-e-ummid gul ho gai

sitam tu ne baad-e-sahar kar diya

thapak kar sulaya mujhe bar-bar

main tha ba-KHabar be-KHabar kar diya

wafaen hamari akarat gain

raqibon ko jam us ne bhar kar diya

jo muddat se thi ji mein ab Than gai

dil-e-pur-KHatar be-KHatar kar diya

jidhar tera tir-e-nazar chal gaya

idhar main ne nazr ek jigar kar diya

nazar mujh se qatil chura jaega

agar main ne sina-sipar kar diya

tumhaari KHamoshi ne us ko 'fahim'

sitamgar se fitna-gar kar diya