zamane mein wo mah-laqa ek hai

zamāne meñ vo mah-laqā ek hai

hazāroñ meñ vo dilrubā ek hai

ḳhudāvand-e-arz-o-samā ek hai

qasam hai ḳhudā kī ḳhudā ek hai

barābar hai apnā vajūd o adam

hamārī baqā aur fanā ek hai

adam ibtidā hai adam intihā

mirī ibtidā intihā ek hai

na hoñge ye hādis rahegā qadīm

ġharaz sab haiñ faanī baqā ek hai

zarā ġhaur se mir.āt-e-dil ko dekh

ye ā.īna-e-haq-numā ek hai

jinheñ kufr o ilhād kahtā hai shaiḳh

faqat pher hai rāstā ek hai

jahāñ meñ haiñ ġhāfil bahut se tarīq

magar rāh-e-sidq-o-safā ek hai

ma.āl-e-suḳhan zikr hai yaar kā

kahūñ sau tarah mudda.ā ek hai

mahal faqr kā hai ajā.ib maqām

yahāñ masnad o boriyā ek hai

kahāñ us ke aage kisī kā faroġh

vo ḳhurshīd-rū mah-laqā ek hai

fazīlat milī ek ko ek par

ġharaz ek se yaañ sivā ek hai

bachegā na kāvish se mizhgāñ ke dil

ki nashtar bahut aabla ek hai

jafākār dam-bāz kāzib muhīl

maiñ vāqif huuñ vo bevafā ek hai

hai amboh-e-ushshāq iisā ke ghar

marīz itne dārushshifā ek hai

nahīñ bachtā donoñ kā maarā huā

tirī zulf aur azhdahā ek hai

na aanā tū us zulf ke pech meñ

are dil vo kaalī balā ek hai

hazāroñ shahīd-e-mohabbat haiñ dafn

galī us kī aur karbalā ek hai

har ik dard kā hai mudāvā vo lab

maraz saikḌoñ haiñ davā ek hai

duī ko na de dil meñ ġhāfil jagah

zabāñ ek hai aur ḳhudā ek hai

kahoge jo kuchh to sunoge bhī 'rind'

hañsī meñ to shaah o gadā ek hai

zamane mein wo mah-laqa ek hai

hazaron mein wo dilruba ek hai

KHudawand-e-arz-o-sama ek hai

qasam hai KHuda ki KHuda ek hai

barabar hai apna wajud o adam

hamari baqa aur fana ek hai

adam ibtida hai adam intiha

meri ibtida intiha ek hai

na honge ye hadis rahega qadim

gharaz sab hain fani baqa ek hai

zara ghaur se miraat-e-dil ko dekh

ye aaina-e-haq-numa ek hai

jinhen kufr o ilhad kahta hai shaiKH

faqat pher hai rasta ek hai

jahan mein hain ghafil bahut se tariq

magar rah-e-sidq-o-safa ek hai

maal-e-suKHan zikr hai yar ka

kahun sau tarah muddaa ek hai

mahal faqr ka hai ajaib maqam

yahan masnad o boriya ek hai

kahan us ke aage kisi ka farogh

wo KHurshid-ru mah-laqa ek hai

fazilat mili ek ko ek par

gharaz ek se yan siwa ek hai

bachega na kawish se mizhgan ke dil

ki nashtar bahut aabla ek hai

jafakar dam-baz kazib muhil

main waqif hun wo bewafa ek hai

hai amboh-e-ushshaq isa ke ghar

mariz itne darushshifa ek hai

nahin bachta donon ka mara hua

teri zulf aur azhdaha ek hai

na aana tu us zulf ke pech mein

are dil wo kali bala ek hai

hazaron shahid-e-mohabbat hain dafn

gali us ki aur karbala ek hai

har ek dard ka hai mudawa wo lab

maraz saikDon hain dawa ek hai

dui ko na de dil mein ghafil jagah

zaban ek hai aur KHuda ek hai

kahoge jo kuchh to sunoge bhi 'rind'

hansi mein to shah o gada ek hai