zamin-e-ishq-o-wafa pe uDti hikayaten bhi nai nahin hain

zamīn-e-ishq-o-vafā pe uḌtī hikāyateñ bhī na.ī nahīñ haiñ

lahū kī gardish meñ raqs kartī rifāqateñ bhī na.ī nahīñ haiñ

mohabbatoñ ke ye faisle to ḳhudā-e-bartar ne likh rakhe haiñ

kahāñ talak ham bachā.eñ dāman ye chāhateñ bhī na.ī nahīñ haiñ

agarche dekhe haiñ zulf-o-lab ke hasīn sapne to kyā ġhalat hai

nazar ke khetoñ meñ ḳhvāb bone kī hasrateñ bhī na.ī nahīñ haiñ

bahār aate hī yuuñ lagā ki chaman darīda-dahan huā hai

gulāb-rut meñ chaman pe nāzil ye āfateñ bhī na.ī nahīñ haiñ

pata nahīñ kyuuñ vo ḳhush bahut hai fuzūl masnad-nashīn ho kar

sagān-e-masnad kī fātehāna himāqateñ bhī na.ī nahīñ haiñ

jhukī nazar se kalām kar ke asiir kar le vo āshiqoñ ko

nazar nazar meñ nazar churāne kī ādateñ bhī na.ī nahīñ haiñ

sanam kī ik ik adā pe 'zākir' na.ī ġhazal kī hai kyā zarūrat

sharārteñ bhī na.ī nahīñ haiñ nazākateñ bhī na.ī nahīñ haiñ

zamin-e-ishq-o-wafa pe uDti hikayaten bhi nai nahin hain

lahu ki gardish mein raqs karti rifaqaten bhi nai nahin hain

mohabbaton ke ye faisle to KHuda-e-bartar ne likh rakhe hain

kahan talak hum bachaen daman ye chahaten bhi nai nahin hain

agarche dekhe hain zulf-o-lab ke hasin sapne to kya ghalat hai

nazar ke kheton mein KHwab bone ki hasraten bhi nai nahin hain

bahaar aate hi yun laga ki chaman darida-dahan hua hai

gulab-rut mein chaman pe nazil ye aafaten bhi nai nahin hain

pata nahin kyun wo KHush bahut hai fuzul masnad-nashin ho kar

sagan-e-masnad ki fatehana himaqaten bhi nai nahin hain

jhuki nazar se kalam kar ke asir kar le wo aashiqon ko

nazar nazar mein nazar churane ki aadaten bhi nai nahin hain

sanam ki ek ek ada pe 'zakir' nai ghazal ki hai kya zarurat

shararten bhi nai nahin hain nazakaten bhi nai nahin hain