zamin ka aaKHiri manzar dikhai dene laga

zamīñ kā āḳhirī manzar dikhā.ī dene lagā

maiñ dekhtā huā patthar dikhā.ī dene lagā

vo sāmne thā to kam kam dikhā.ī detā thā

chalā gayā to barābar dikhā.ī dene lagā

nishān-e-hijr bhī hai vasl kī nishāniyoñ meñ

kahāñ kā zaḳhm kahāñ par dikhā.ī dene lagā

vo is tarah se mujhe dekhtā huā guzrā

maiñ apne aap ko behtar dikhā.ī dene lagā

tujhe ḳhabar hī nahīñ raat mo.ajiza jo huā

añdhere ko, tujhe chhū kar, dikhā.ī dene lagā

kuchh itne ġhaur se dekhā charāġh jaltā huā

ki maiñ charāġh ke andar dikhā.ī dene lagā

pahuñch gayā tirī āñkhoñ ke us kināre tak

jahāñ se mujh ko samundar dikhā.ī dene lagā

zamin ka aaKHiri manzar dikhai dene laga

main dekhta hua patthar dikhai dene laga

wo samne tha to kam kam dikhai deta tha

chala gaya to barabar dikhai dene laga

nishan-e-hijr bhi hai wasl ki nishaniyon mein

kahan ka zaKHm kahan par dikhai dene laga

wo is tarah se mujhe dekhta hua guzra

main apne aap ko behtar dikhai dene laga

tujhe KHabar hi nahin raat moajiza jo hua

andhere ko, tujhe chhu kar, dikhai dene laga

kuchh itne ghaur se dekha charagh jalta hua

ki main charagh ke andar dikhai dene laga

pahunch gaya teri aankhon ke us kinare tak

jahan se mujh ko samundar dikhai dene laga