zamin ki kya kahun ki sar pe aasman bhi nahin

zamīñ kī kyā kahūñ ki sar pe āsmān bhī nahīñ

hamārī qismat-e-vafā meñ imtihān bhī nahīñ

uḌe to kis tarah uḌe ye aaj tā.ir-e-nigāh

havā bhī gard gard hai paroñ meñ jaan bhī nahīñ

sunūñ maiñ us kī jhuuT baat aur hañs ke chup rahūñ

ki mere muñh meñ apne vāste zabān bhī nahīñ

qalam uThāo aaj maiñ lahū kā zā.iqa likhūñ

ki ab mire yaqīn meñ zarā gumān bhī nahīñ

yahī vo shaḳhs hai kabhī jo bastiyoñ kā zo.am thā

isī kī dastaras meñ ab koī makān bhī nahīñ

ye jism-o-jāñ kā qāfila thakan se chūr-chūr hai

magar rah-e-hayāt meñ to sā.ebān bhī nahīñ

ubuur kar chuke tamām dasht dasht rāste

magar hamāre azm meñ zarā takān bhī nahīñ

tumhārī baat baat se bhare paḌe haiñ roz-o-shab

sunā.eñ kyā kisī ko mo'atabar bayān bhī nahīñ

zamin ki kya kahun ki sar pe aasman bhi nahin

hamari qismat-e-wafa mein imtihan bhi nahin

uDe to kis tarah uDe ye aaj tair-e-nigah

hawa bhi gard gard hai paron mein jaan bhi nahin

sunun main us ki jhuT baat aur hans ke chup rahun

ki mere munh mein apne waste zaban bhi nahin

qalam uThao aaj main lahu ka zaiqa likhun

ki ab mere yaqin mein zara guman bhi nahin

yahi wo shaKHs hai kabhi jo bastiyon ka zoam tha

isi ki dastaras mein ab koi makan bhi nahin

ye jism-o-jaan ka qafila thakan se chur-chur hai

magar rah-e-hayat mein to saeban bhi nahin

ubur kar chuke tamam dasht dasht raste

magar hamare azm mein zara takan bhi nahin

tumhaari baat baat se bhare paDe hain roz-o-shab

sunaen kya kisi ko mo'atabar bayan bhi nahin