zamin meri rahegi na aaina mera

zamīn merī rahegī na aa.ina merā

ki āzmāne chalā hai mujhe ḳhudā merā

mire tilism se āzād bhī nahīñ lekin

vo phuul pahlī nazar meñ huā na thā merā

na.iim basra-o-baġhdād hārne ke ba.ad

mirā vajūd bhī shāyad nahīñ rahā merā

vo mere paas rahe yā kahīñ chalā jaa.e

rahegā us ke ḳhayāloñ se silsila merā

kisī kī khoj meñ niklā thā be-irāda maiñ

badan niDhāl thā sar ghūmtā huā merā

nahīñ hai ab mujhe anjām kī koī parvā

baḌhā diyā hai mohabbat ne hausla merā

huā hai qat.a masāfat kā silsila jaarī

maiñ ruk gayā to badan TūTne lagā merā

yaqīñ nahīñ hai magar naqsh hai mire dil par

ki ik parī ne banāyā hai zā.icha merā

vo baar baar palaTtā hai duur jā-jā kar

so TuuT TuuT ke juḌtā hai rābta merā

nazar kī had pe jo ik najm-e-ḳhvāb hai 'sājid'

vahī charāġh hai us kā vahī diyā merā

zamin meri rahegi na aaina mera

ki aazmane chala hai mujhe KHuda mera

mere tilism se aazad bhi nahin lekin

wo phul pahli nazar mein hua na tha mera

naim basra-o-baghdad haarne ke baad

mera wajud bhi shayad nahin raha mera

wo mere pas rahe ya kahin chala jae

rahega us ke KHayalon se silsila mera

kisi ki khoj mein nikla tha be-irada main

badan niDhaal tha sar ghumta hua mera

nahin hai ab mujhe anjam ki koi parwa

baDha diya hai mohabbat ne hausla mera

hua hai qata masafat ka silsila jari

main ruk gaya to badan TuTne laga mera

yaqin nahin hai magar naqsh hai mere dil par

ki ek pari ne banaya hai zaicha mera

wo bar bar palaTta hai dur ja-ja kar

so TuT TuT ke juDta hai rabta mera

nazar ki had pe jo ek najm-e-KHwab hai 'sajid'

wahi charagh hai us ka wahi diya mera