zamin nahin ye meri aasman nahin mera

zamīñ nahīñ ye mirī āsmāñ nahīñ merā

matā-e-ḳhvāb ba-juz kuchh yahāñ nahīñ merā

ye uuñT aur kisī ke haiñ dasht merā hai

savār mere nahīñ sār-bāñ nahīñ merā

mujhe tumhāre tayaqqun se ḳhauf aatā hai

ki is yaqīn meñ shāmil gumāñ nahīñ merā

maiñ ho gayā huuñ ḳhud apne safar se begāna

ki niiñd merī hai ḳhvāb-e-ravāñ nahīñ merā

to aab o ḳhaak se bach kar kidhar ko jaatā maiñ

davām-e-vasl hai baaqī nishāñ nahīñ merā

phir ek din usī miTTī ko lauT jā.ūñgā

gurez tujh se rah-e-raftagāñ nahīñ merā

sadā-e-shahr-e-guzishta abhī bulātī hai

go ab aziiz koī bhī vahāñ nahīñ merā

zamin nahin ye meri aasman nahin mera

mata-e-KHwab ba-juz kuchh yahan nahin mera

ye unT aur kisi ke hain dasht mera hai

sawar mere nahin sar-ban nahin mera

mujhe tumhaare tayaqqun se KHauf aata hai

ki is yaqin mein shamil guman nahin mera

main ho gaya hun KHud apne safar se begana

ki nind meri hai KHwab-e-rawan nahin mera

to aab o KHak se bach kar kidhar ko jata main

dawam-e-wasl hai baqi nishan nahin mera

phir ek din usi miTTi ko lauT jaunga

gurez tujh se rah-e-raftagan nahin mera

sada-e-shahr-e-guzishta abhi bulati hai

go ab aziz koi bhi wahan nahin mera