zamin-o-asman sab ek se hain

zamīn-o-āsmāñ sab ek se haiñ

hamāre mehrbāñ sab ek se haiñ

kise apnā kahīñ kis ko parāyā

jahāñ ham haiñ vahāñ sab ek se haiñ

jahāñ vāloñ ke zāhir par na jaao

ye bātin meñ miyāñ sab ek se haiñ

nahīñ kuchh farq tujh meñ aur mujh meñ

ki ham ahl-e-jahāñ sab ek se haiñ

na kyuuñ sābit ho jurm-e-be-gunāhī

gavāhoñ ke bayāñ sab ek se haiñ

vahī guzrā hai dil kī rahguzar se

ki qadmoñ ke nishāñ sab ek se haiñ

yahāñ ke rahne vaale muḳhtalif haiñ

magar 'ḳhāvar' makāñ sab ek se haiñ

zamin-o-asman sab ek se hain

hamare mehrban sab ek se hain

kise apna kahin kis ko paraya

jahan hum hain wahan sab ek se hain

jahan walon ke zahir par na jao

ye baatin mein miyan sab ek se hain

nahin kuchh farq tujh mein aur mujh mein

ki hum ahl-e-jahan sab ek se hain

na kyun sabit ho jurm-e-be-gunahi

gawahon ke bayan sab ek se hain

wahi guzra hai dil ki rahguzar se

ki qadmon ke nishan sab ek se hain

yahan ke rahne wale muKHtalif hain

magar 'KHawar' makan sab ek se hain