zamin pe insan KHuda bana tha waba se pahle

zamīñ pe insāñ ḳhudā banā thā vabā se pahle

vo ḳhud ko sab kuchh samajh rahā thā vabā se pahle

palak jhapakte hī saarā manzar badal gayā hai

yahāñ to mela lagā huā thā vabā se pahle

tum aaj hāthoñ se dūriyāñ nāpte ho socho

diloñ meñ kis darja fāsla thā vabā se pahle

ajiib sī dauḌ meñ sab aise lage hue the

makāñ makīnoñ ko DhūñDhtā thā vabā se pahle

ham aaj ḳhalvat meñ is zamāne ko ro rahe haiñ

vo jis se sab ko bahut gila thā vabā se pahle

na jaane kyoñ aa gayā duā meñ mirī vo bachcha

saḌak pe jo phuul bechtā thā vabā se pahle

duā ko uTThe haiñ haath 'amabar' to dhyān aayā

ye āsmāñ surḳh ho chukā thā vabā se pahle

zamin pe insan KHuda bana tha waba se pahle

wo KHud ko sab kuchh samajh raha tha waba se pahle

palak jhapakte hi sara manzar badal gaya hai

yahan to mela laga hua tha waba se pahle

tum aaj hathon se duriyan napte ho socho

dilon mein kis darja fasla tha waba se pahle

ajib si dauD mein sab aise lage hue the

makan makinon ko DhunDhta tha waba se pahle

hum aaj KHalwat mein is zamane ko ro rahe hain

wo jis se sab ko bahut gila tha waba se pahle

na jaane kyon aa gaya dua mein meri wo bachcha

saDak pe jo phul bechta tha waba se pahle

dua ko uTThe hain hath 'amabar' to dhyan aaya

ye aasman surKH ho chuka tha waba se pahle