zanjir se junun ki KHalish kam na ho saki

zanjīr se junūñ kī ḳhalish kam na ho sakī

bhaḌkī agar ye aañch to maddham na ho sakī

badle bahār-e-lāla-o-gul ne hazār rañg

lekin jamāl-e-dost kā aalam na ho sakī

kyā kyā ġhubār uThā.e nazar ke fasād ne

insāniyat kī lau kabhī maddham na ho sakī

ham laakh bad-maza hue jām-e-hayāt se

jiine kī pyaas thī ki kabhī kam na ho sakī

jo jhuk ga.ī jabīñ tire naqsh-e-qadam kī samt

tā-zīst phir vo aur kahīñ ḳham na ho sakī

mujh se na pūchh apnī hī teġh-e-adā se pūchh

kyuuñ terī chashm-e-lutf bhī marham na ho sakī

kitne rumūz-e-shauq in āñkhoñ meñ rah ga.e

jin se nigāh-e-dost bhī mahram na ho sakī

mauj-e-nasīm apnī bahāreñ luTā ga.ī

lekin ḳhizāñ kī muda-dilī kam na ho sakī

allāh-re ishtiyāq nigāh-e-umīd kā

kho.e ho.uuñ kī yaad meñ pur-nam na ho sakī

gul-kārī-e-nazar ho ki rañg-e-jamāl-e-dost

kuchh baat thī ki ziist jahannam na ho sakī

in kī jabīñ pe ḳhair se ik rañg aa gayā

merī vafā agarche musallam na ho sakī

apne hī ghar kī ḳhair manā.ī tamām umr

ham se 'surūr' fikr-e-do-ālam na ho sakī

zanjir se junun ki KHalish kam na ho saki

bhaDki agar ye aanch to maddham na ho saki

badle bahaar-e-lala-o-gul ne hazar rang

lekin jamal-e-dost ka aalam na ho saki

kya kya ghubar uThae nazar ke fasad ne

insaniyat ki lau kabhi maddham na ho saki

hum lakh bad-maza hue jam-e-hayat se

jine ki pyas thi ki kabhi kam na ho saki

jo jhuk gai jabin tere naqsh-e-qadam ki samt

ta-zist phir wo aur kahin KHam na ho saki

mujh se na puchh apni hi tegh-e-ada se puchh

kyun teri chashm-e-lutf bhi marham na ho saki

kitne rumuz-e-shauq in aankhon mein rah gae

jin se nigah-e-dost bhi mahram na ho saki

mauj-e-nasim apni bahaaren luTa gai

lekin KHizan ki muda-dili kam na ho saki

allah-re ishtiyaq nigah-e-umid ka

khoe houn ki yaad mein pur-nam na ho saki

gul-kari-e-nazar ho ki rang-e-jamal-e-dost

kuchh baat thi ki zist jahannam na ho saki

in ki jabin pe KHair se ek rang aa gaya

meri wafa agarche musallam na ho saki

apne hi ghar ki KHair manai tamam umr

hum se 'surur' fikr-e-do-alam na ho saki