zanjir se uThti hai sada sahmi hui si

zanjīr se uThtī hai sadā sahmī huī sī

jaarī hai abhī gardish-e-pā sahmī huī sī

dil TuuT to jaatā hai pe girya nahīñ kartā

kyā Dar hai ki rahtī hai vafā sahmī huī sī

uTh jaa.e nazar bhuul ke gar jānib-e-aflāk

hoñToñ se nikaltī hai duā sahmī huī sī

haañ hañs lo rafīqo kabhī dekhī nahīñ tum ne

namnāk nigāhoñ meñ hayā sahmī huī sī

taqsīr koī ho to sazā umr kā ronā

miT jaa.eñ vafā meñ to jazā sahmī huī sī

haañ ham ne bhī paayā hai sila apne hunar kā

lafzoñ ke lifāfoñ meñ baqā sahmī huī sī

har luqme pe khaTkā hai kahīñ ye bhī na chhin jaa.e

mede meñ utartī hai ġhizā sahmī huī sī

uThtī to hai sau baar pe mujh tak nahīñ aatī

is shahr meñ chaltī hai havā sahmī huī sī

hai 'arsh' vahāñ aaj muhīt ek ḳhamoshī

jis raah se guzrī thī qazā sahmī huī sī

zanjir se uThti hai sada sahmi hui si

jari hai abhi gardish-e-pa sahmi hui si

dil TuT to jata hai pe girya nahin karta

kya Dar hai ki rahti hai wafa sahmi hui si

uTh jae nazar bhul ke gar jaanib-e-aflak

honTon se nikalti hai dua sahmi hui si

han hans lo rafiqo kabhi dekhi nahin tum ne

namnak nigahon mein haya sahmi hui si

taqsir koi ho to saza umr ka rona

miT jaen wafa mein to jaza sahmi hui si

han hum ne bhi paya hai sila apne hunar ka

lafzon ke lifafon mein baqa sahmi hui si

har luqme pe khaTka hai kahin ye bhi na chhin jae

mede mein utarti hai ghiza sahmi hui si

uThti to hai sau bar pe mujh tak nahin aati

is shahr mein chalti hai hawa sahmi hui si

hai 'arsh' wahan aaj muhit ek KHamoshi

jis rah se guzri thi qaza sahmi hui si