zar-parasti hayat ho jae

zar-parastī hayāt ho jaa.e

is se behtar vafāt ho jaa.e

phir maiñ duniyā meñ ghuum saktā huuñ

jism se gar najāt ho jaa.e

mahvar-e-ishq se zarā sā haTe

muntashir kā.enāt ho jaa.e

dil kisī khel meñ nahīñ lagtā

jab mohabbat meñ maat ho jaa.e

ek devī kī aañkh aise lagī

jaise mandir meñ raat ho jaa.e

kitne bīmār-e-ishq bach jaa.eñ

husn par gar zakāt ho jaa.e

but-shikan kyā bigāḌ saktā hai

dil agar somnāt ho jaa.e

aap dil chor ho ham ahl-e-dil

vaqt do vārdāt ho jaa.e

aañkh paḌhnā jise bhī aa jaa.e

māhir-e-nafsiyāt ho jaa.e

aks-e-lailā se 'qais' baat to kar

ain mumkin hai baat ho jaa.e

zar-parasti hayat ho jae

is se behtar wafat ho jae

phir main duniya mein ghum sakta hun

jism se gar najat ho jae

mahwar-e-ishq se zara sa haTe

muntashir kaenat ho jae

dil kisi khel mein nahin lagta

jab mohabbat mein mat ho jae

ek dewi ki aankh aise lagi

jaise mandir mein raat ho jae

kitne bimar-e-ishq bach jaen

husn par gar zakat ho jae

but-shikan kya bigaD sakta hai

dil agar somnat ho jae

aap dil chor ho hum ahl-e-dil

waqt do wardat ho jae

aankh paDhna jise bhi aa jae

mahir-e-nafsiyat ho jae

aks-e-laila se 'qais' baat to kar

ain mumkin hai baat ho jae