zara ishaara hua aasman ke andar se

zarā ishāra huā āsmāñ ke andar se

duā pahuñch bhī ga.ī ḳhāk-dāñ ke andar se

kahānī phail rahī hai usī ke chāroñ taraf

nikālnā thā jise dāstāñ ke andar se

mujhe paḌāv meñ ḳhatra safar se baḌh kar hai

ki rāhzan hai mire kārvāñ ke andar se

tū mujh meñ aa ke makīñ ho gayā to har aaseb

nikal gayā hai mire jism-o-jāñ ke andar se

maiñ sirf dekhne aayā huuñ raunaq-e-bāzār

ġharaz nahīñ hai kisī bhī dukāñ ke andar se

na.e sire se banānā paḌā hai ab ḳhud ko

talāsh kar ke mujhe rā.egāñ ke andar se

tire ḳhilāf gavāhī jo ban ga.e haiñ vo lafz

liye ga.e haiñ tire hī bayāñ ke andar se

maiñ darmiyāñ huuñ alaav ke aur mirī āvāz

to sun rahā hai usī darmiyāñ ke andar se

lagā rahā tū kisī din kashīd kar lūñgā

na.ī zabān purānī zabāñ ke andar se

abhī to ye dar-o-dīvār jānte haiñ mujhe

abhī to maiñ nahīñ niklā makāñ ke andar se

'zahīr' paar utarne kā faisla jo kiyā

kināra mil gayā āb-e-ravāñ ke andar se

zara ishaara hua aasman ke andar se

dua pahunch bhi gai KHak-dan ke andar se

kahani phail rahi hai usi ke chaaron taraf

nikalna tha jise dastan ke andar se

mujhe paDaw mein KHatra safar se baDh kar hai

ki rahzan hai mere karwan ke andar se

tu mujh mein aa ke makin ho gaya to har aaseb

nikal gaya hai mere jism-o-jaan ke andar se

main sirf dekhne aaya hun raunaq-e-bazar

gharaz nahin hai kisi bhi dukan ke andar se

nae sire se banana paDa hai ab KHud ko

talash kar ke mujhe raegan ke andar se

tere KHilaf gawahi jo ban gae hain wo lafz

liye gae hain tere hi bayan ke andar se

main darmiyan hun alaw ke aur meri aawaz

to sun raha hai usi darmiyan ke andar se

laga raha tu kisi din kashid kar lunga

nai zaban purani zaban ke andar se

abhi to ye dar-o-diwar jaante hain mujhe

abhi to main nahin nikla makan ke andar se

'zahir' par utarne ka faisla jo kiya

kinara mil gaya aab-e-rawan ke andar se