zara mushkil hai lekin phir bhi aksar dekh leta hun

zarā mushkil hai lekin phir bhī aksar dekh letā huuñ

tirī āñkhoñ meñ vo simTā samundar dekh letā huuñ

takabbur jab kabhī hotā hai mujh ko is amīrī par

shahr se duur jā kar koī khanDar dekh letā huuñ

maiñ baḌh jaatā huuñ terī samt sab kuchh bhuul kar lekin

tire hoñToñ meñ phir se koī ḳhanjar dekh letā huuñ

nazar phir kyoñ nahīñ aatā use ye zaḳhm-e-dil merā

kiyā kartā hai da.avā dil ke andar dekh letā huuñ

ajab vaqt-e-judā.ī hai kisī kā bas nahīñ chaltā

vo darvāze pe aatī hai maiñ muḌ kar dekh letā huuñ

ye aadat hai merī rusvā mujhe hone nahīñ detī

maiñ phailātā huuñ jab bhī pair chādar dekh letā huuñ

sunā hai manzileñ miltī haiñ mushkil se mohabbat kī

'samar' us raah bhī ik baar chal kar dekh letā huuñ

zara mushkil hai lekin phir bhi aksar dekh leta hun

teri aankhon mein wo simTa samundar dekh leta hun

takabbur jab kabhi hota hai mujh ko is amiri par

shahr se dur ja kar koi khanDar dekh leta hun

main baDh jata hun teri samt sab kuchh bhul kar lekin

tere honTon mein phir se koi KHanjar dekh leta hun

nazar phir kyon nahin aata use ye zaKHm-e-dil mera

kiya karta hai dawa dil ke andar dekh leta hun

ajab waqt-e-judai hai kisi ka bas nahin chalta

wo darwaze pe aati hai main muD kar dekh leta hun

ye aadat hai meri ruswa mujhe hone nahin deti

main phailata hun jab bhi pair chadar dekh leta hun

suna hai manzilen milti hain mushkil se mohabbat ki

'samar' us rah bhi ek bar chal kar dekh leta hun