zara na hum pe kiya eatibar guzri hai

zarā na ham pe kiyā e.atibār guzrī hai

ye ruuh jism se begāna-vār guzrī hai

hameñ gumāñ bhī na thā un kī tab-e-nāzuk par

zarā sī baat satā.ish kī baar guzrī hai

ḳhirad ke zor se himmat ke bāl-o-par le kar

kahāñ kahāñ se ye musht-e-ġhubār guzrī hai

kaTegā kaise ye vīrān be-sahārā din

abhī to sirf shab-e-intizār guzrī hai

badūn-e-zaḳhm na ro.eñge paañv ke chhāle

bahe sarishk jahāñ nok-e-ḳhār guzrī hai

kahāñ hai aariz ḳhurshīd-e-nīm-roze ki umr

miyān-e-kākul-e-shab-hā-e-tār guzrī hai

chhupā laboñ pe tabassum ayaañ jabīñ pe shikan

hañsī kī baat unheñ nāgavār guzrī hai

ga.ī jidhar se vo mad.hosh ho ga.ī mahfil

magar vo shoḳh nazar hoshiyār guzrī hai

aqab meñ apne chhupā.e hazār-hā paikāñ

nazar ke sāmne mizhgān-e-yār guzrī hai

hujūm-e-shauq ke hāthoñ gale pe 'hāmid' ke

na pūchhiye jo dam-e-iḳhtisār guzrī hai

zara na hum pe kiya eatibar guzri hai

ye ruh jism se begana-war guzri hai

hamein guman bhi na tha un ki tab-e-nazuk par

zara si baat sataish ki bar guzri hai

KHirad ke zor se himmat ke baal-o-par le kar

kahan kahan se ye musht-e-ghubar guzri hai

kaTega kaise ye viran be-sahaara din

abhi to sirf shab-e-intizar guzri hai

badun-e-zaKHm na roenge panw ke chhaale

bahe sarishk jahan nok-e-KHar guzri hai

kahan hai aariz KHurshid-e-nim-roze ki umr

miyan-e-kakul-e-shab-ha-e-tar guzri hai

chhupa labon pe tabassum ayan jabin pe shikan

hansi ki baat unhen nagawar guzri hai

gai jidhar se wo madhosh ho gai mahfil

magar wo shoKH nazar hoshiyar guzri hai

aqab mein apne chhupae hazar-ha paikan

nazar ke samne mizhgan-e-yar guzri hai

hujum-e-shauq ke hathon gale pe 'hamid' ke

na puchhiye jo dam-e-iKHtisar guzri hai