zara sa imkan kis qadar tha

zarā sā imkān kis qadar thā

fazā meñ haijān kis qadar thā

maiñ kis qadar thā qarīb us ke

vo merī pahchān kis qadar thā

libās par thā zarā sā ik daaġh

badan pareshān kis qadar thā

yahī ki us se kabhī na TuuTe

hameñ ki ik dhyān kis qadar thā

na jaane kyā log bichhḌe hoñge

vo moḌ sunsān kis qadar thā

vo saare ġham kyā hue ḳhudāyā

ye dil ki gunjān kis qadar thā

bahāl ho jaa.eñ phir vo rishte

use bhī armān kis qadar thā

bhaTak ga.e kitne log 'bānī'

na.e kā ruj.hān kis qadar thā

zara sa imkan kis qadar tha

faza mein haijaan kis qadar tha

main kis qadar tha qarib us ke

wo meri pahchan kis qadar tha

libas par tha zara sa ek dagh

badan pareshan kis qadar tha

yahi ki us se kabhi na TuTe

hamein ki ek dhyan kis qadar tha

na jaane kya log bichhDe honge

wo moD sunsan kis qadar tha

wo sare gham kya hue KHudaya

ye dil ki gunjaan kis qadar tha

bahaal ho jaen phir wo rishte

use bhi arman kis qadar tha

bhaTak gae kitne log 'bani'

nae ka rujhan kis qadar tha