zara si der jo KHauf-e-dawam KHatm hua

zarā sī der jo ḳhauf-e-davām ḳhatm huā

ye mat samajh ki ye hū kā maqām ḳhatm huā

kahāñ gayā jaras-e-karbalā bulā ke mujhe

ki rāste meñ mirā ghar tamām ḳhatm huā

na terī pyaas ne dariyāoñ se hī bai.at kī

na pāniyoñ pe likhā terā naam ḳhatm huā

daraḳht saare sameTe hue haiñ shāḳh-e-ḳhulūs

chalo ki pahle safar kā qayām ḳhatm huā

chunegā soḳhta ḳhemoñ kī raakh aur koī

lagā ke aag havā kā to kaam ḳhatm huā

sar-e-ufuq koī taarā na be-navā koī chīḳh

ye kin tabāhiyoñ pe rañj-shām ḳhatm huā

zara si der jo KHauf-e-dawam KHatm hua

ye mat samajh ki ye hu ka maqam KHatm hua

kahan gaya jaras-e-karbala bula ke mujhe

ki raste mein mera ghar tamam KHatm hua

na teri pyas ne dariyaon se hi baiat ki

na paniyon pe likha tera nam KHatm hua

daraKHt sare sameTe hue hain shaKH-e-KHulus

chalo ki pahle safar ka qayam KHatm hua

chunega soKHta KHemon ki rakh aur koi

laga ke aag hawa ka to kaam KHatm hua

sar-e-ufuq koi tara na be-nawa koi chiKH

ye kin tabahiyon pe ranj-sham KHatm hua