zara si raat Dhal jae to shayad nind aa jae

zarā sī raat Dhal jaa.e to shāyad niiñd aa jaa.e

zarā sā dil bahal jaa.e to shāyad niiñd aa jaa.e

abhī to karb hai be-chainiyāñ haiñ be-qarārī hai

tabī.at kuchh sambhal jaa.e to shāyad niiñd aa jaa.e

havā ke narm jhoñkoñ ne jagāyā terī yādoñ ko

havā kā ruḳh badal jaa.e to shāyad niiñd aa jaa.e

ye tūfāñ āñsuoñ kā jo umaD aayā hai palkoñ tak

kisī sūrat ye Tal jaa.e to shāyad niiñd aa jaa.e

ye hañstā muskurātā qāfila jo chāñd tāroñ kā

'farah' aage nikal jaa.e to shāyad niiñd aa jaa.e

zara si raat Dhal jae to shayad nind aa jae

zara sa dil bahal jae to shayad nind aa jae

abhi to karb hai be-chainiyan hain be-qarari hai

tabiat kuchh sambhal jae to shayad nind aa jae

hawa ke narm jhonkon ne jagaya teri yaadon ko

hawa ka ruKH badal jae to shayad nind aa jae

ye tufan aansuon ka jo umaD aaya hai palkon tak

kisi surat ye Tal jae to shayad nind aa jae

ye hansta muskuraata qafila jo chand taron ka

'farah' aage nikal jae to shayad nind aa jae