zara si raushni ke waste ai mehrban maine

zarā sī raushnī ke vāste ai mehrbāñ maiñ ne

jalā Daalā hai dekho ḳhud hī apnā āshiyāñ maiñ ne

sitam dekho usī ne zahr gholā zindagānī meñ

jise samjhā kiyā ab tak rafīq-o-rāz-dāñ maiñ ne

na pūchho kitne armānoñ kī lāsheñ dafn kiiñ maiñ ne

sajā.ī haiñ tamannāoñ kī kitnī arthiyāñ maiñ ne

qadam rāh-e-mohabbat meñ sañbhal kar dosto rakhnā

luTāyā hai isī raste meñ apnā kārvāñ maiñ ne

shabāb aayā hai 'ashraf' ab shabistān-e-tasavvur par

lahū de de ke sīñchā thā ḳhayāl-e-gulsitāñ maiñ ne

zara si raushni ke waste ai mehrban main ne

jala Dala hai dekho KHud hi apna aashiyan main ne

sitam dekho usi ne zahr ghola zindagani mein

jise samjha kiya ab tak rafiq-o-raaz-dan main ne

na puchho kitne armanon ki lashen dafn kin main ne

sajai hain tamannaon ki kitni arthiyan main ne

qadam rah-e-mohabbat mein sanbhal kar dosto rakhna

luTaya hai isi raste mein apna karwan main ne

shabab aaya hai 'ashraf' ab shabistan-e-tasawwur par

lahu de de ke sincha tha KHayal-e-gulsitan main ne