zarf-e-kohna gala diya jae

zarf-e-kohna galā diyā jaa.e

ruup us ko nayā diyā jaa.e

apnī agnī meñ vo jale na mazīd

shams ko ye batā diyā jaa.e

pūchhnā kyā hai būḌhe ambar se

us ke yad meñ asā diyā jaa.e

apnī apnī hudūd hī meñ raheñ

bahr-o-bar ko batā diyā jaa.e

in se phūloñ ko īrkhā hogī

titliyoñ ko uḌā diyā jaa.e

suunā suunā hai jo bhī sahn vahāñ

peḌ tan kā lagā diyā jaa.e

mahvashoñ kī jo fasl lenī hai

arz par mah ugā diyā jaa.e

arz ke vāste ye achchhā hai

beach meñ nabh haTā diyā jaa.e

sub.h ho jab to māhtāb ko kyā

lorī de kar sulā diyā jaa.e

in ko lamhoñ meñ bāñTanā hai abhī

sā.atoñ ko baḌhā diyā jaa.e

zindagī hai agar sarāb 'figār'

jag ko sahrā banā diyā jaa.e

zarf-e-kohna gala diya jae

rup us ko naya diya jae

apni agni mein wo jale na mazid

shams ko ye bata diya jae

puchhna kya hai buDhe ambar se

us ke yad mein asa diya jae

apni apni hudud hi mein rahen

bahr-o-bar ko bata diya jae

in se phulon ko irkha hogi

titliyon ko uDa diya jae

suna suna hai jo bhi sahn wahan

peD tan ka laga diya jae

mahwashon ki jo fasl leni hai

arz par mah uga diya jae

arz ke waste ye achchha hai

beach mein nabh haTa diya jae

subh ho jab to mahtab ko kya

lori de kar sula diya jae

in ko lamhon mein banTana hai abhi

saaton ko baDha diya jae

zindagi hai agar sarab 'figar'

jag ko sahra bana diya jae