zarur chashm-e-tamasha chaman pe naz kare

zarūr chashm-e-tamāshā chaman pe naaz kare

magar bahār-o-ḳhizāñ meñ to imtiyāz kare

mirī hayāt kā maqsad hai sirf lazzat-e-ġham

koī ye silsila-e-ġham zarā darāz kare

junūñ ke daur meñ ho jis ko shauq-e-gul-chīnī

chaman meñ kaise vo kāñToñ se ehtirāz kare

yahī hai ḳhāliq-e-jazbāt kā karam shāyad

tumheñ ḳhushī se hameñ ġham se sarfarāz kare

na kījiye kisī gustāḳhī-e-junūñ kā malāl

kise hai hosh ki farq-e-niyāz-o-nāz kare

rah-e-vafā meñ tamannā-e-iltifāt hai kufr

jo jī meñ aa.e vo husn-e-karishma-sāz kare

jabīn-e-shauq to rakh dī hai maiñ ne dar pe tire

ye terā kaam hai bāb-e-karam bhī baaz kare

sunā hai rāz-e-haqīqat usī hijāb meñ hai

jo dīda-var ho vahī azmat-e-majāz kare

vo koī dil nahīñ patthar hai asl meñ 'ashraf'

jo aadmī ko mohabbat se be-niyāz kare

zarur chashm-e-tamasha chaman pe naz kare

magar bahaar-o-KHizan mein to imtiyaz kare

meri hayat ka maqsad hai sirf lazzat-e-gham

koi ye silsila-e-gham zara daraaz kare

junun ke daur mein ho jis ko shauq-e-gul-chini

chaman mein kaise wo kanTon se ehtiraaz kare

yahi hai KHaliq-e-jazbaat ka karam shayad

tumhein KHushi se hamein gham se sarfaraaz kare

na kijiye kisi gustaKHi-e-junun ka malal

kise hai hosh ki farq-e-niyaz-o-naz kare

rah-e-wafa mein tamanna-e-iltifat hai kufr

jo ji mein aae wo husn-e-karishma-saz kare

jabin-e-shauq to rakh di hai main ne dar pe tere

ye tera kaam hai bab-e-karam bhi baz kare

suna hai raaz-e-haqiqat usi hijab mein hai

jo dida-war ho wahi azmat-e-majaz kare

wo koi dil nahin patthar hai asl mein 'ashraf'

jo aadmi ko mohabbat se be-niyaz kare