zau-fishan sine mein soz-e-gham-e-pinhan nikla

zau-fishāñ siine meñ soz-e-ġham-e-pinhāñ niklā

dil kā har daaġh charāġh-e-tah-e-dāmāñ niklā

koī bhī jab na anīs-e-shab-e-hijrāñ niklā

dard-e-dil ḳhud hī mire haal kā pursāñ niklā

justujū meñ tirī ai jalva-numā-e-hastī

koī kāfir to koī ban ke musalmāñ niklā

maġhfirat ko hai mire nāma-e-a.amāl pe naaz

jab na mujh sā koī āsūda-e-isyāñ niklā

pūchhtā kyā hai haqīqat mire jazb-e-dil kī

dil ke har qatre meñ simTā huā tūfāñ niklā

kitnā vābasta asīrī se thā daur-e-hastī

mar ke zindāñ se asīr-e-dar-e-zindāñ niklā

maiñ ne jis sang pe sajda kiyā jazb-e-dil se

vo bhī minjumla-e-sang-e-dar-e-jānāñ niklā

is tarah ḳhatm huī jabr-o-qadar kī hujjat

merī taqdīr se sāhil pe bhī tūfāñ niklā

baḳhiya-gar ne mirī jab jāma-darī ko dekhā

chāk-dāman kī jagah chāk-garebāñ niklā

ġham nahīñ sāhil-e-dariyā kī tunuk-zarfī kā

Dūbne vaalā to āsūda-e-tūfāñ niklā

saḳhtī-e-hashr-o-qayāmat mujhe vaa.iz taslīm

aur jo vaañ bhī na javāb-e-ġham-e-jānāñ niklā

rif.at-e-charḳh ho yā ho vo zamīñ kī vus.at

hāmil-e-bār-e-amānat faqat insāñ niklā

ho chukā jāma-e-vahshī kā rafū ai 'afqar'

abhī dāman na siyā thā ki girebāñ niklā

zau-fishan sine mein soz-e-gham-e-pinhan nikla

dil ka har dagh charagh-e-tah-e-daman nikla

koi bhi jab na anis-e-shab-e-hijran nikla

dard-e-dil KHud hi mere haal ka pursan nikla

justuju mein teri ai jalwa-numa-e-hasti

koi kafir to koi ban ke musalman nikla

maghfirat ko hai mere nama-e-amal pe naz

jab na mujh sa koi aasuda-e-isyan nikla

puchhta kya hai haqiqat mere jazb-e-dil ki

dil ke har qatre mein simTa hua tufan nikla

kitna wabasta asiri se tha daur-e-hasti

mar ke zindan se asir-e-dar-e-zindan nikla

main ne jis sang pe sajda kiya jazb-e-dil se

wo bhi minjumla-e-sang-e-dar-e-jaanan nikla

is tarah KHatm hui jabr-o-qadar ki hujjat

meri taqdir se sahil pe bhi tufan nikla

baKHiya-gar ne meri jab jama-dari ko dekha

chaak-daman ki jagah chaak-gareban nikla

gham nahin sahil-e-dariya ki tunuk-zarfi ka

Dubne wala to aasuda-e-tufan nikla

saKHti-e-hashr-o-qayamat mujhe waiz taslim

aur jo wan bhi na jawab-e-gham-e-jaanan nikla

rifat-e-charKH ho ya ho wo zamin ki wusat

hamil-e-bar-e-amanat faqat insan nikla

ho chuka jama-e-wahshi ka rafu ai 'afqar'

abhi daman na siya tha ki gireban nikla