zawal mein bhi raha dil-nashin nazara mera

zavāl meñ bhī rahā dil-nashīñ nazāra mirā

mire hī saath girā TuuT ke sitāra mirā

kisī pe ramz mirī baat kī khulī hī nahīñ

na kaam aayā mire koī isti.āra mirā

yaqīñ kisī ko na aayā maiñ Duub saktā huuñ

samajh rahe the agarche sabhī ishāra mirā

nadī kī tarah kināra bhī kāTtā huuñ maiñ

kisī hisār meñ hotā nahīñ guzāra mirā

ye baat jaan ke hairat nahīñ huī mujh ko

ki merī aag se raushan rahā sitāra mirā

na rok paa.ī mujhe maujoñ kī koī sāzish

ravāñ-davāñ hai abhī jhiil meñ shikārā mirā

abhī se samt badalne lagā maiñ kyuuñ 'ālam'

abhī to duur bahut duur hai kinārā mirā

zawal mein bhi raha dil-nashin nazara mera

mere hi sath gira TuT ke sitara mera

kisi pe ramz meri baat ki khuli hi nahin

na kaam aaya mere koi istiara mera

yaqin kisi ko na aaya main Dub sakta hun

samajh rahe the agarche sabhi ishaara mera

nadi ki tarah kinara bhi kaTta hun main

kisi hisar mein hota nahin guzara mera

ye baat jaan ke hairat nahin hui mujh ko

ki meri aag se raushan raha sitara mera

na rok pai mujhe maujon ki koi sazish

rawan-dawan hai abhi jhil mein shikara mera

abhi se samt badalne laga main kyun 'alam'

abhi to dur bahut dur hai kinara mera