ذہنوں میں مصلحت ہے دلوں میں امنگ ہے

ذہنوں میں مصلحت ہے دلوں میں امنگ ہے

برپا حریم شوق میں اک سرد جنگ ہے

چہرہ اداس دل میں گھٹن عقل دنگ ہے

ٹوٹا ہوا حیات کا ایک ایک انگ ہے

کیا انقلاب وقت ہے کیا دیکھتا ہوں میں

شیشہ گران شہر کے ہاتھوں میں سنگ ہے

اب کیسے خار و گل میں کرے کوئی امتیاز

جو گل کا رنگ ہے وہی کانٹوں کا رنگ ہے

ہر پھول زخم زخم شگوفہ لہو لہو

شاید بہار اب کے برس خوں ترنگ ہے

ناموس بزم دیدہ و دل تھا جو وہ سخن

لوح جبین شوق پہ اب حرف ننگ ہے

لفظ و بیاں میں کھو گئے سب اہل فن عزیزؔ

باقی تمہارے دم سے تغزل کا رنگ ہے