zer-o-bam se saz-e-KHilqat ke jahan banta gaya

zer-o-bam se sāz-e-ḳhilqat ke jahāñ bantā gayā

ye zamīñ bantī ga.ī ye āsmāñ bantā gayā

dāstān-e-jaur-e-behad ḳhuun se likhtā rahā

qatra qatra ashk-e-ġham kā be-karāñ bantā gayā

ishq-e-tanhā se huiiñ ābād kitnī manzileñ

ik musāfir kārvāñ-dar-kārvāñ bantā gayā

maiñ tire jis ġham ko apnā jāntā thā vo bhī to

zeb-e-unvān-e-hadīs-e-dīgarāñ bantā gayā

baat nikle baat se jaise vo thā terā bayāñ

naam terā dāstāñ-dar-dāstāñ bantā gayā

ham ko hai ma.alūm sab rūdād-e-ilm-o-falsafa

haañ har īmān-o-yaqīñ vahm-o-gumāñ bantā gayā

maiñ kitāb-e-dil meñ apnā hāl-e-ġham likhtā rahā

har varaq ik bāb-e-tārīḳh-e-jahāñ bantā gayā

bas usī kī tarjumānī hai mire ash.ār meñ

jo sukūt-e-rāz rañgīñ dāstāñ bantā gayā

maiñ ne sauñpā thā tujhe ik kaam saarī umr meñ

vo bigaḌtā hī gayā ai dil kahāñ bantā gayā

vārdāt-e-dil ko dil hī meñ jagah dete rahe

har hisāb-e-ġham hisāb-e-dostāñ bantā gayā

merī ghuTTī meñ paḌī thī ho ke hal urdu zabāñ

jo bhī maiñ kahtā gayā husn-e-bayāñ bantā gayā

vaqt ke hāthoñ yahāñ kyā kyā ḳhazāne luT ga.e

ek terā ġham ki ganj-e-shā.īgāñ bantā gayā

sar-zamīn-e-hind par aqvām-e-ālam ke 'firāq'

qāfile baste ga.e hindostāñ bantā gayā

zer-o-bam se saz-e-KHilqat ke jahan banta gaya

ye zamin banti gai ye aasman banta gaya

dastan-e-jaur-e-behad KHun se likhta raha

qatra qatra ashk-e-gham ka be-karan banta gaya

ishq-e-tanha se huin aabaad kitni manzilen

ek musafir karwan-dar-karwan banta gaya

main tere jis gham ko apna jaanta tha wo bhi to

zeb-e-unwan-e-hadis-e-digaran banta gaya

baat nikle baat se jaise wo tha tera bayan

nam tera dastan-dar-dastan banta gaya

hum ko hai malum sab rudad-e-ilm-o-falsafa

han har iman-o-yaqin wahm-o-guman banta gaya

main kitab-e-dil mein apna haal-e-gham likhta raha

har waraq ek bab-e-tariKH-e-jahan banta gaya

bas usi ki tarjumani hai mere ashaar mein

jo sukut-e-raaz rangin dastan banta gaya

main ne saunpa tha tujhe ek kaam sari umr mein

wo bigaDta hi gaya ai dil kahan banta gaya

wardat-e-dil ko dil hi mein jagah dete rahe

har hisab-e-gham hisab-e-dostan banta gaya

meri ghuTTi mein paDi thi ho ke hal urdu zaban

jo bhi main kahta gaya husn-e-bayan banta gaya

waqt ke hathon yahan kya kya KHazane luT gae

ek tera gham ki ganj-e-shaigan banta gaya

sar-zamin-e-hind par aqwam-e-alam ke 'firaq'

qafile baste gae hindostan banta gaya