zikr hai dard ka ek shahr basa hai mujhse

zikr hai dard kā ik shahr basā hai mujh se

ab ye jaanā ki merā dard baḌā hai mujh se

bahut ehsāñ hai jo koī bhī milā hai mujh se

shahr kā shahr magar jaise ḳhafā hai mujh se

bār-hā ḳhud pe maiñ hairān bahut hotā huuñ

koī hai mujh meñ jo bilkul hī judā hai mujh se

kaT se jaate haiñ sabhī koī nahīñ kuchh kahtā

kaun sā jaane qusūr aisā huā hai mujh se

muñh pe kahne to lage haiñ mirī bastī vaale

baat karne kā chalan kuchh to chalā hai mujh se

baat karte hue ḳhud se jo guzartā hai koī

mujh ko lagtā hai ye kuchh us ne kahā hai mujh se

abhī lauT aa.egā mirī hī tarah kuḌhtā sā

mere hī ghar kā pata pūchh gayā hai mujh se

maiñ ne ye sab se kahā tum to kahīñ ke na rahe

aur dekho ki yahī sab ne kahā hai mujh se

hai koī mujh sā kahūñ kyā na maiñ jānūñ na kuchh aur

aur merā hī pata pūchh rahā hai mujh se

'talḳh' jaatā hī nahīñ dukh ke nagar kahtā hai

hai vahāñ jo bhī vo mil kar hī gayā hai mujh se

zikr hai dard ka ek shahr basa hai mujh se

ab ye jaana ki mera dard baDa hai mujh se

bahut ehsan hai jo koi bhi mila hai mujh se

shahr ka shahr magar jaise KHafa hai mujh se

bar-ha KHud pe main hairan bahut hota hun

koi hai mujh mein jo bilkul hi juda hai mujh se

kaT se jate hain sabhi koi nahin kuchh kahta

kaun sa jaane qusur aisa hua hai mujh se

munh pe kahne to lage hain meri basti wale

baat karne ka chalan kuchh to chala hai mujh se

baat karte hue KHud se jo guzarta hai koi

mujh ko lagta hai ye kuchh us ne kaha hai mujh se

abhi lauT aaega meri hi tarah kuDhta sa

mere hi ghar ka pata puchh gaya hai mujh se

main ne ye sab se kaha tum to kahin ke na rahe

aur dekho ki yahi sab ne kaha hai mujh se

hai koi mujh sa kahun kya na main jaanun na kuchh aur

aur mera hi pata puchh raha hai mujh se

'talKH' jata hi nahin dukh ke nagar kahta hai

hai wahan jo bhi wo mil kar hi gaya hai mujh se