zikr mera ba-badi bhi use manzur nahin

zikr merā ba-badī bhī use manzūr nahīñ

ġhair kī baat bigaḌ jaa.e to kuchh duur nahīñ

vada-e-sair-e-gulistāñ hai ḳhushā tāle-e-shauq

muzhda-e-qatl muqaddar hai jo mazkūr nahīñ

shāhid-e-hastī-e-mutlaq kī kamar hai aalam

log kahte haiñ ki hai par hameñ manzūr nahīñ

qatra apnā bhī haqīqat meñ hai dariyā lekin

ham ko taqlīd-e-tunuk-zarfi-e-mansūr nahīñ

hasrat ai zauq-e-ḳharābī ki vo tāqat na rahī

ishq-e-pur-arbada kī guuñ tan-e-ranjūr nahīñ

maiñ jo kahtā huuñ ki ham leñge qayāmat meñ tumheñ

kis ra.ūnat se vo kahte haiñ ki ham huur nahīñ

zulm kar zulm agar lutf dareġh aatā ho

tū taġhāful meñ kisī rañg se ma.azūr nahīñ

saaf durdi-kash-e-paimāna-e-jam haiñ ham log

vaa.e vo baada ki afsharda-e-añgūr nahīñ

huuñ zuhūrī ke muqābil meñ ḳhifā.ī 'ġhālib'

mere da.ave pe ye hujjat hai ki mash.hūr nahīñ

zikr mera ba-badi bhi use manzur nahin

ghair ki baat bigaD jae to kuchh dur nahin

wada-e-sair-e-gulistan hai KHusha tale-e-shauq

muzhda-e-qatl muqaddar hai jo mazkur nahin

shahid-e-hasti-e-mutlaq ki kamar hai aalam

log kahte hain ki hai par hamein manzur nahin

qatra apna bhi haqiqat mein hai dariya lekin

hum ko taqlid-e-tunuk-zarfi-e-mansur nahin

hasrat ai zauq-e-KHarabi ki wo taqat na rahi

ishq-e-pur-arbada ki gun tan-e-ranjur nahin

main jo kahta hun ki hum lenge qayamat mein tumhein

kis raunat se wo kahte hain ki hum hur nahin

zulm kar zulm agar lutf daregh aata ho

tu taghaful mein kisi rang se mazur nahin

saf durdi-kash-e-paimana-e-jam hain hum log

wae wo baada ki afsharda-e-angur nahin

hun zuhuri ke muqabil mein KHifai 'ghaalib'

mere dawe pe ye hujjat hai ki mashhur nahin