zikr us ka nahin kiya maine

zikr us kā nahīñ kiyā maiñ ne

zaḳhm apnā nahīñ chhuā maiñ ne

mujh ko darkār zindagī kab thī

zindagī ko magar jiyā maiñ ne

tum na karnā kisī pe aisā kabhī

jaisā tum par yaqīñ kiyā maiñ ne

faisla jo aham ziyāda thā

soch kar vo nahīñ kiyā maiñ ne

'ishq kā khel aise khelā hai

jaise khelā ho ik juā maiñ ne

har dafa maiñ savāl kartī thī

ab ki bas faisla kiyā maiñ ne

jo ḳhatā kī nahīñ thī us kā bhī

sar pe ilzām le liyā maiñ ne

zikr us ka nahin kiya main ne

zaKHm apna nahin chhua main ne

mujh ko darkar zindagi kab thi

zindagi ko magar jiya main ne

tum na karna kisi pe aisa kabhi

jaisa tum par yaqin kiya main ne

faisla jo aham ziyaada tha

soch kar wo nahin kiya main ne

'ishq ka khel aise khela hai

jaise khela ho ek jua main ne

har dafa main sawal karti thi

ab ki bas faisla kiya main ne

jo KHata ki nahin thi us ka bhi

sar pe ilzam le liya main ne