zinda hon is jahan mein aaKHir koi jawaz

zinda hoñ is jahān meñ āḳhir koī javāz

in bastiyoñ kā ḳhvāb jo ab tak basīñ nahīñ

tum shoḳh ho to pyaar bhī merā sharīr hai

haañ haañ mire liye hai tumhārī nahīñ nahīñ

dil ho ki sar yahāñ to sarāpā-e-dard haiñ

aisā nahīñ ki dard kahīñ hai kahīñ nahīñ

elān-e-haq-shi.ār bhī hai phir gila bhī hai

nafrīn har kahīñ hai kahīñ āfrīñ nahīñ

kī umr ne vafā to inhoñ ne vafā na kī

dil meñ jo ārzūeñ kabhī thiiñ rahīñ nahīñ

paspā.ī pahle hī tirā maqsūm hai agar

tujh ko masāf-e-zīst meñ ye añgbīñ nahīñ

qariyoñ ke satr-posh junūñ ko salām-e-shauq

dāman nahīñ hai jeb nahīñ āstīñ nahīñ

in dostāñ meñ mashk-faroshāñ meñ mast huuñ

ḳhalvat meñ aa ke bhī jo mire aib-chīñ nahīñ

zinda hon is jahan mein aaKHir koi jawaz

in bastiyon ka KHwab jo ab tak basin nahin

tum shoKH ho to pyar bhi mera sharir hai

han han mere liye hai tumhaari nahin nahin

dil ho ki sar yahan to sarapa-e-dard hain

aisa nahin ki dard kahin hai kahin nahin

elan-e-haq-shiar bhi hai phir gila bhi hai

nafrin har kahin hai kahin aafrin nahin

ki umr ne wafa to inhon ne wafa na ki

dil mein jo aarzuen kabhi thin rahin nahin

paspai pahle hi tera maqsum hai agar

tujh ko masaf-e-zist mein ye angbin nahin

qariyon ke satr-posh junun ko salam-e-shauq

daman nahin hai jeb nahin aastin nahin

in dostan mein mashk-faroshan mein mast hun

KHalwat mein aa ke bhi jo mere aib-chin nahin