zindan-e-roz-o-shab mein asir-e-hayat hun

zindān-e-roz-o-shab meñ asīr-e-hayāt huuñ

ik umr kaT ga.ī hai magar be-sabāt huuñ

dekho to ek zarra huuñ is kā.enāt kā

samjho to apnī zaat meñ ik kā.enāt huuñ

tū māvarā-e-arsh-o-zamīn-o-zamān hai

maiñ tere izn-e-kun se sar-e-shash-jihāt huuñ

haiñ ka.aba-e-darūñ meñ butān-e-havā-e-nafs

har chand ki maiñ munkir-e-lāt-o-manāt huuñ

chaltī havā ke saath to abanā-e-vaqt haiñ

maiñ ahd-e-tīrgī meñ charāġhoñ ke saath huuñ

kyuuñ terī zindagī se nikālā gayā mujhe

kyā maiñ tire nisāb kī vājib zakāt huuñ

zindan-e-roz-o-shab mein asir-e-hayat hun

ek umr kaT gai hai magar be-sabaat hun

dekho to ek zarra hun is kaenat ka

samjho to apni zat mein ek kaenat hun

tu mawara-e-arsh-o-zamin-o-zaman hai

main tere izn-e-kun se sar-e-shash-jihat hun

hain kaba-e-darun mein butan-e-hawa-e-nafs

har chand ki main munkir-e-lat-o-manat hun

chalti hawa ke sath to abana-e-waqt hain

main ahd-e-tirgi mein charaghon ke sath hun

kyun teri zindagi se nikala gaya mujhe

kya main tere nisab ki wajib zakat hun