zindagani ka koi bab samajh lo laDki

zindagānī kā koī baab samajh lo laḌkī

bhuul hī jaao mujhe ḳhvāb samajh lo laḌkī

ishq karne kī hai ḳhvāhish ye maiñ samjhā lekin

tum mire jism ke ādāb samajh lo laḌkī

vasl kī raat vo maiñ ne jise ta.amīr kiyā

hasrat-e-ishq kī mehrāb samajh lo laḌkī

tum ne barsāt ke mausam meñ jise dekhā thā

vo hai sūkhā huā tālāb samajh lo laḌkī

ishq insān meñ aurat ko jagā detā hai

log ho jaate haiñ shādāb samajh lo laḌkī

merī banjar huī āñkhoñ pe yaqīñ mat karnā

ye bhī lā saktī haiñ sailāb samajh lo laḌkī

aaj kal tum jo ye mahsūs kiyā kartī ho

tajraba hai koī nāyāb samajh lo laḌkī

ye jo dīvān mire naam se chhap kar aayā

tum ise zehn kā ḳhūnāb samajh lo laḌkī

zindagani ka koi bab samajh lo laDki

bhul hi jao mujhe KHwab samajh lo laDki

ishq karne ki hai KHwahish ye main samjha lekin

tum mere jism ke aadab samajh lo laDki

wasl ki raat wo main ne jise tamir kiya

hasrat-e-ishq ki mehrab samajh lo laDki

tum ne barsat ke mausam mein jise dekha tha

wo hai sukha hua talab samajh lo laDki

ishq insan mein aurat ko jaga deta hai

log ho jate hain shadab samajh lo laDki

meri banjar hui aankhon pe yaqin mat karna

ye bhi la sakti hain sailab samajh lo laDki

aaj kal tum jo ye mahsus kiya karti ho

tajraba hai koi nayab samajh lo laDki

ye jo diwan mere nam se chhap kar aaya

tum ise zehn ka KHunab samajh lo laDki