zindagani ko fan ke nam kiya

zindagānī ko fan ke naam kiyā

kaam karnā thā maiñ ne kaam kiyā

ilm hī kī sharāb pī jhuk kar

ḳhud ko hargiz na vaqf-e-jām kiyā

ġham huā merī zindagī kā madār

is qadar ġham kā ehtirām kiyā

jaise ma.ashūq se ho rū-e-suḳhan

zindagī tujh se yuuñ kalām kiyā

ḳhaak chhānī jo fan ke sahrā kī

ham ne zauq-e-junūñ ko aam kiyā

kāmilān-e-suḳhan ko paḌh paḌh kar

sher-goī meñ kuchh to naam kiyā

apne fan par na aañch aane dī

umr bhar fan kā ehtirām kiyā

koī manzil na thī jo sar na huī

jab bhī himmat ko tez-gām kiyā

husn ko maiñ ne TuuT kar chāhā

husn ke dil meñ bhī qayām kiyā

fan meñ mujh jaisī jis ne kāvish kī

maiñ ne dil se use salām kiyā

umr bhar shā.erī jo kī maġhmūm

maiñ ne gumnāmiyoñ meñ naam kiyā

zindagani ko fan ke nam kiya

kaam karna tha main ne kaam kiya

ilm hi ki sharab pi jhuk kar

KHud ko hargiz na waqf-e-jam kiya

gham hua meri zindagi ka madar

is qadar gham ka ehtiram kiya

jaise mashuq se ho ru-e-suKHan

zindagi tujh se yun kalam kiya

KHak chhani jo fan ke sahra ki

hum ne zauq-e-junun ko aam kiya

kaamilan-e-suKHan ko paDh paDh kar

sher-goi mein kuchh to nam kiya

apne fan par na aanch aane di

umr bhar fan ka ehtiram kiya

koi manzil na thi jo sar na hui

jab bhi himmat ko tez-gam kiya

husn ko main ne TuT kar chaha

husn ke dil mein bhi qayam kiya

fan mein mujh jaisi jis ne kawish ki

main ne dil se use salam kiya

umr bhar shaeri jo ki maghmum

main ne gumnamiyon mein nam kiya