thi abhi subh abhi sham hui jati hai

thī abhī sub.h abhī shaam huī jaatī hai

zindagī gardish-e-ayyām huī jaatī hai

zindagī mohlat-e-taufīq-e-ḳhum-āshāmī thī

zindagī fursat-e-yak-jām huī jaatī hai

zindagī tā.ir-e-sahrā thī ba-shauq-e-parvāz

zindagī said-e-tah-e-dām huī jaatī hai

zindagī Daal rahī thī jo sitāroñ pe kamand

ab tamāshā-e-lab-e-bām huī jaatī hai

zindagī ye hai ki bā-īñ-hama-saudā-e-safar

zindagī hasrat-e-yak-gām huī jaatī hai

zindagī ye hai ki jis ret pe jalte the qadam

ab vahī bistar-e-ārām huī jaatī hai

zindagī ye hai ki soyā thā musāfir thak kar

so ke uTThā hai to ab shaam huī jaatī hai

'maz.harī' fan kā taqāzā hai ki likhiye kuchh aur

ye ġhazal koshish-e-nākām huī jaatī hai

thi abhi subh abhi sham hui jati hai

zindagi gardish-e-ayyam hui jati hai

zindagi mohlat-e-taufiq-e-KHum-ashami thi

zindagi fursat-e-yak-jam hui jati hai

zindagi tair-e-sahra thi ba-shauq-e-parwaz

zindagi said-e-tah-e-dam hui jati hai

zindagi Dal rahi thi jo sitaron pe kamand

ab tamasha-e-lab-e-baam hui jati hai

zindagi ye hai ki ba-in-hama-sauda-e-safar

zindagi hasrat-e-yak-gam hui jati hai

zindagi ye hai ki jis ret pe jalte the qadam

ab wahi bistar-e-aram hui jati hai

zindagi ye hai ki soya tha musafir thak kar

so ke uTTha hai to ab sham hui jati hai

'mazhari' fan ka taqaza hai ki likhiye kuchh aur

ye ghazal koshish-e-nakaam hui jati hai