zindagi chonchle na kar humse

zindagī choñchle na kar ham se

dekh pachhtā.egī tū Dar ham se

zaḳhm-ḳhurdoñ ke jaane se paidā

ho gayā hai ḳhalā to bhar ham se

log sirhānoñ meñ uḌasne lage

pūchh mat hāl-e-bāl-o-par ham se

gir ga.ī raushnā.ī kī botal

terā kāġhaz huā hai tar ham se

ek din hāñkā thā parinde ko

abhī nārāz hai shajar ham se

rab raqīboñ ko baḳhshe to baḳhshe

nahīñ hotā hai darguzar ham se

zindagī kā mo.āmla hai yahī

ham safar se haiñ aur safar ham se

sher likh ke 'shafaq' yuuñ lagtā hai

ho gayā zer ik zabar ham se

zindagi chonchle na kar hum se

dekh pachhtaegi tu Dar hum se

zaKHm-KHurdon ke jaane se paida

ho gaya hai KHala to bhar hum se

log sirhanon mein uDasne lage

puchh mat haal-e-baal-o-par hum se

gir gai raushnai ki botal

tera kaghaz hua hai tar hum se

ek din hanka tha parinde ko

abhi naraaz hai shajar hum se

rab raqibon ko baKHshe to baKHshe

nahin hota hai darguzar hum se

zindagi ka moamla hai yahi

hum safar se hain aur safar hum se

sher likh ke 'shafaq' yun lagta hai

ho gaya zer ek zabar hum se