zindagi do ghaDi ki masti hai

zindagī do ghaḌī kī mastī hai

maut ta.abīr-e-ḳhvāb-e-hastī hai

har nafas sirf ġham-parastī hai

merī hastī ajiib hastī hai

fasl-e-gul hai havā meñ mastī hai

āj-kal lutf-e-mai-parastī hai

āsmāñ par dimāġh-e-hastī hai

ye bulandī nahīñ hai pastī hai

ye javānī tirī ma.āz-allāh

laakh mastī kī ek mastī hai

tere kūche se baiTh kar uThnā

kasar-e-shān-e-vafā-parastī hai

jins-e-dād-e-vafā mohabbat meñ

jaan de kar mile to sastī hai

chashmak-e-barq tābish-e-sho.ala

dil kī hastī bhī koī hastī hai

tum ne dil muskurā ke chhīn liyā

ye adā hai ki chīra-dastī hai

hoñ haqīqat-shanās agar āñkheñ

but-parastī ḳhudā-parastī hai

dil tire vasl ke liye betāb

aañkh dīdār ko tarastī hai

be-ḳhudī ishq kā hai sarmāya

husn kī kā.enāt mastī hai

dil meñ ghuTtā rahegā dil kā dhuāñ

ye ghaTā khul ke kab barastī hai

chheḌtā huuñ kisī sitamgar ko

kyā mazāq-e-jafā-parastī hai

jis ko vīrāna kahte haiñ 'nudrat'

vo bhī vahshat-zadoñ kī bastī hai

zindagi do ghaDi ki masti hai

maut tabir-e-KHwab-e-hasti hai

har nafas sirf gham-parasti hai

meri hasti ajib hasti hai

fasl-e-gul hai hawa mein masti hai

aaj-kal lutf-e-mai-parasti hai

aasman par dimagh-e-hasti hai

ye bulandi nahin hai pasti hai

ye jawani teri maaz-allah

lakh masti ki ek masti hai

tere kuche se baiTh kar uThna

kasar-e-shan-e-wafa-parasti hai

jins-e-dad-e-wafa mohabbat mein

jaan de kar mile to sasti hai

chashmak-e-barq tabish-e-shoala

dil ki hasti bhi koi hasti hai

tum ne dil muskura ke chhin liya

ye ada hai ki chira-dasti hai

hon haqiqat-shanas agar aankhen

but-parasti KHuda-parasti hai

dil tere wasl ke liye betab

aankh didar ko tarasti hai

be-KHudi ishq ka hai sarmaya

husn ki kaenat masti hai

dil mein ghuTta rahega dil ka dhuan

ye ghaTa khul ke kab barasti hai

chheDta hun kisi sitamgar ko

kya mazaq-e-jafa-parasti hai

jis ko virana kahte hain 'nudrat'

wo bhi wahshat-zadon ki basti hai