zindagi dushwar hogi ye kabhi socha na tha

zindagī dushvār hogī ye kabhī sochā na thā

vo bagūle ġham ke uTThe jin kā andesha na thā

sāmne tum aa ga.e ho to batā duuñ jān-e-jāñ

jaise dil dhaḌkā thā ab ki vaise dil dhaḌkā na thā

ye irāda kar liyā thā ham na bichhḌeñge kabhī

TūTeñge ik pal meñ rishte ye kabhī sochā na thā

yād-e-māzī miT rahī hai vaqt kī raftār se

ab tasavvur meñ hamāre koī bhī chehra na thā

saḳht hairat ho rahī hai dekh kar apnā vajūd

dhuup meñ the sab ke saaye par mirā saayā na thā

shauq-e-manzil dekh merī dekh merā hausla

shahr-e-dil ke rāstoñ meñ maiñ kabhī Thahrā na thā

'qalb' ko sahrā-navardī raas kyā aatī bhalā

vo kabhī āvārgī meñ dar-ba-dar bhaTkā na thā

zindagi dushwar hogi ye kabhi socha na tha

wo bagule gham ke uTThe jin ka andesha na tha

samne tum aa gae ho to bata dun jaan-e-jaan

jaise dil dhaDka tha ab ki waise dil dhaDka na tha

ye irada kar liya tha hum na bichhDenge kabhi

TuTenge ek pal mein rishte ye kabhi socha na tha

yaad-e-mazi miT rahi hai waqt ki raftar se

ab tasawwur mein hamare koi bhi chehra na tha

saKHt hairat ho rahi hai dekh kar apna wajud

dhup mein the sab ke saye par mera saya na tha

shauq-e-manzil dekh meri dekh mera hausla

shahr-e-dil ke raston mein main kabhi Thahra na tha

'qalb' ko sahra-nawardi ras kya aati bhala

wo kabhi aawargi mein dar-ba-dar bhaTka na tha