zindagi gar de KHuda aalam naya paida karun

zindagī gar de ḳhudā aalam nayā paidā karūñ

roz ho ho kar fanā rañg-e-baqā paidā karūñ

jalva-gāh-e-nāz meñ kyoñ kar rahūñ sābit-qadam

har jafā kā hai taqāzā ik vafā paidā karūñ

hāsil-e-sad-zindagānī ik matā-e-dard hai

hazrat-e-nāseh ko ye zid hai davā paidā karūñ

yaañ to iz.hār-e-tamannā vaañ ḳhamoshī kī adā

mudda.ā ye hai dil be-mudda.ā paidā karūñ

ek hī kā husn hai jalva-numā kaunain meñ

dūsrā to jab kahūñ jab dūsrā paidā karūñ

chārasāz dard-e-dil tū hī hai rab-e-be-niyāz

tere hote dūsrā kyoñ ai ḳhudā paidā karūñ

dil kā armāñ ek se hai ek baḌh kar intiḳhāb

kaun sā hamdam miTā.ūñ kaun sā paidā karūñ

sar ke da.ave sab miTā kar dil meñ dekhūñ rū-e-dost

ḳhud-numā.ī ho chukī qibla-numā paidā karūñ

husn-e-roz-afzūñ kī jalve haiñ ġhazab kī dilrubā

kis tarah har roz 'hasrat' dil nayā paidā karūñ

zindagi gar de KHuda aalam naya paida karun

roz ho ho kar fana rang-e-baqa paida karun

jalwa-gah-e-naz mein kyon kar rahun sabit-qadam

har jafa ka hai taqaza ek wafa paida karun

hasil-e-sad-zindagani ek mata-e-dard hai

hazrat-e-naseh ko ye zid hai dawa paida karun

yan to izhaar-e-tamanna wan KHamoshi ki ada

muddaa ye hai dil be-muddaa paida karun

ek hi ka husn hai jalwa-numa kaunain mein

dusra to jab kahun jab dusra paida karun

chaarasaz dard-e-dil tu hi hai rab-e-be-niyaz

tere hote dusra kyon ai KHuda paida karun

dil ka arman ek se hai ek baDh kar intiKHab

kaun sa hamdam miTaun kaun sa paida karun

sar ke dawe sab miTa kar dil mein dekhun ru-e-dost

KHud-numai ho chuki qibla-numa paida karun

husn-e-roz-afzun ki jalwe hain ghazab ki dilruba

kis tarah har roz 'hasrat' dil naya paida karun