zindagi humse KHafa ho jaise

zindagī ham se ḳhafā ho jaise

ab davā ho na duā ho jaise

terī furqat meñ huā yuuñ mahsūs

zindagī ek sazā ho jaise

is tarah kartā huuñ puujā terī

tū mohabbat kā ḳhudā ho jaise

aisā armān-e-mulāqāt bhī kiyā

dil meñ tūfān bapā ho jaise

ab to ehsās-e-tamannā bhī nahīñ

qāfila dil kā luTā ho jaise

mere hoñToñ pe tirā zikr-e-jamīl

har nafas mauj-e-sabā ho jaise

terī āñkhoñ se barastī mastī

ek mai-ḳhāna khulā ho jaise

ġham se miltī hai masarrat dil ko

ġham bhī terī hī adā ho jaise

jhanjhanā uTThā hai dil kā har taar

aap kā naam sunā ho jaise

vo pashemāñ haiñ tabāhī pe mirī

ye bhī un kī hī ḳhatā ho jaise

talḳhi-e-jām meñ pinhāñ 'sāhir'

dard dil kī bhī davā ho jaise

zindagi hum se KHafa ho jaise

ab dawa ho na dua ho jaise

teri furqat mein hua yun mahsus

zindagi ek saza ho jaise

is tarah karta hun puja teri

tu mohabbat ka KHuda ho jaise

aisa arman-e-mulaqat bhi kiya

dil mein tufan bapa ho jaise

ab to ehsas-e-tamanna bhi nahin

qafila dil ka luTa ho jaise

mere honTon pe tera zikr-e-jamil

har nafas mauj-e-saba ho jaise

teri aankhon se barasti masti

ek mai-KHana khula ho jaise

gham se milti hai masarrat dil ko

gham bhi teri hi ada ho jaise

jhanjhana uTTha hai dil ka har tar

aap ka nam suna ho jaise

wo pasheman hain tabahi pe meri

ye bhi un ki hi KHata ho jaise

talKHi-e-jam mein pinhan 'sahir'

dard dil ki bhi dawa ho jaise