zindagi ishq-o-mohabbat se jawan hoti hai

zindagī ishq-o-mohabbat se javāñ hotī hai

varna be-kaif sī be-tāb-o-tavāñ hotī hai

ishq kī lau se jo raushan rag-e-jāñ hotī hai

sham.a ban jaatī hai be-ishq dhuāñ hotī hai

kaun ham jaisoñ ko is mai kā pata detā hai

pahle kuchh log batāte the ki haañ hotī hai

hāv-hū shor jo ham sunte haiñ mai-ḳhāne meñ

mai-gusāroñ ke liye bāñg-e-azāñ hotī hai

ik na ik nāseh-e-mushfiq bhī Tapak paḌtā hai

mai-gusārī kī koī baat jahāñ hotī hai

ai 'hakīm' aao vo mai-ḳhāna khulā rahtā hai

asl mai sāqī-e-kausar ke vahāñ hotī hai

zindagi ishq-o-mohabbat se jawan hoti hai

warna be-kaif si be-tab-o-tawan hoti hai

ishq ki lau se jo raushan rag-e-jaan hoti hai

shama ban jati hai be-ishq dhuan hoti hai

kaun hum jaison ko is mai ka pata deta hai

pahle kuchh log batate the ki han hoti hai

haw-hu shor jo hum sunte hain mai-KHane mein

mai-gusaron ke liye bang-e-azan hoti hai

ek na ek naseh-e-mushfiq bhi Tapak paDta hai

mai-gusari ki koi baat jahan hoti hai

ai 'hakim' aao wo mai-KHana khula rahta hai

asl mai saqi-e-kausar ke wahan hoti hai